मरता केव्हा ही येतं...
फक्त जन्म आहे तोवर जगता आलं पाहिजे...!!!
आवडलं.
मरता तर केव्हा ही येतं.
जन्म आहे तोवर ताकद मनात असली पाहिजे.ठेवली पाहिजे. जगली पाहिजे. आणि खरं म्हणजे अनुभवली पाहिजे.
कारण आपण आहोतच जबरदस्त. आहोतच भारी. ज्याने बनवलं त्याने तसं खास बनवलंच आहे आपल्याला.
त्यामुळे जोवर जन्म आहे तोवर त्याचा आदर राखायलाच हवा.
जोवर जन्म आहे तोवर किंमत समजली पाहिजे.
स्वतःची.
आयुष्याची.
माणसांची.
कामाची.
जीवनाची.
इथे खूप काही करण्याची संधी आहे.
इथे माणसांचं निर्भेळ, निर्मळ प्रेम तुम्हाला मिळत राहील.
ती केवढी मोठी संपत्ती आहे. ज्याला हे सगळं नाही मिळत त्याला विचारून पाहिलत की समजेल.
उघड्या डोळ्यांनी पाहाल तर कळेल...
की सगळं ठिकठाक आहे..
आपण धडधाकट आहोत.
संधी वाट पाहताहेत.
कष्ट करायला हा दिवस उपलब्ध झालाय.
जवळच्यांचं प्रेम कोणत्याही अटीशिवाय बरसतय.
आणि श्रीमंती बद्दल काय बोलायचं आपल्या..
हवं तेवढं सुंदर बोलू शकतो आपण ही संपत्ती आहे आपली.
आपल्याला जमेल तेवढी मदत जरूर आपण करू शकतो आपण समोरच्याची ही संपत्ती आहे आपली.
कष्टांच्या जोरावर हवं ते शिकू शकतो आपण. कित्ती व्यासंग उपलब्ध आहे जगभर ..मनापासून मजा घ्यायचीच म्हटल्यावर करायला किती गोष्टी उपलब्ध आहेत. खरंच ..ही खूप मोठी संपत्ती आहे आपली..
यातलं जे जे बहारदार वाटेल तेवढं टिपायचं.
माणसांवर प्रेम करण्याची अफाट ताकद आपल्याला भेटली आहे.
मनापासून तुमच्यातलं प्रेम आजमावून तर पाहा. ही सारी दुनिया तुमची दोस्त होऊन जाईल.
आणि हे सगळं करण्यापूर्वी एक करा..
आजचा दिवस हा बहार आहे.
तो मनापासून जगा.. मजा घ्या त्याची.
विचारांनी धडधाकट होण्याकडे लक्ष जरूर द्या.
माणूस म्हणून बहारदार व्हायचंय आपल्याला हे जरूर ठरवा.
तुम्ही मजा घ्यायला लागलात ना आपल्या कामाची, स्वतःची, आजूबाजूच्या माणसांची, नवनवीन गोष्टी try करून पाहण्याची की आपोआप सगळं मस्त होईल.. भारी होईल...
खरंय की कधी अडचणीचे प्रसंग येतात. कधी हव्या त्या गाठी लवकर बसत नाहीत. हव्या त्या गोष्टी जुळून नाहीत येत. कधी शब्दात व्यक्त करता येत नाही असं आणि कशानेही कदाचित भरून निघत नाही असं काहीतरी अनुभवतो आपण.
पण हे असे प्रसंग ही खरंतर बरच काही शिकवून जातात आपल्याला. काही वेळा या दोन वेळच्या अन्नातच समाधान मानून काढायच्या असतात. काही वेळा प्रयत्नांची रंगत अनुभवत काढायच्या असतात. काही वेळा सगळं हळू झालेलंच बरं असतं अन काही वेळा अशा असतात की जेव्हा आपल्या हातात आहे तेवढं केल्यावर बाकी सगळं सोडून देण्यातच खरा अर्थ असतो. काही वेळा प्रश्न काळाच्या कसोटीवर उत्तर भेटण्यासाठी सोडून देऊन काढायच्या असतात अन काही वेळा ते दुःख पचवून जे झालं त्या गोष्टी च्या स्मरणात आयुष्य जगण्याची नवी शपथ घेऊन त्या घडलेल्या घटनांना, गोष्टींना एक नवं वचन द्यायच्या ,नवी सुरुवात करायच्या.. स्वतः ला ,आयुष्याला पुन्हा एक नवी संधी द्यायच्या प्रार्थनीय वेळा असतात.....
म्हणून नवी सुरुवात तर अगदीच करायला हवी.. बरं वाटतं.. आपल्याला अन आपल्या आत असलेल्या त्या असंख्य जिवलगांना ....!!!
आपण सुंदर झालो ना की जग आपोआप मस्त होऊन जातं.
आपलं काम हीच आपली जगाला सेवा आहे. त्यामुळे ते अधिकाधिक चांगलं करणं हाच समाजाचा, देशाचा, जगाचा विकास आहे.
आपले विचार बहारदार होणं हेच संस्कृती जपणं आणि जगणं आहे. चांगल्या विचारांच्या नशेत राहणं कधीही चांगलं.विचारच आपल्याला घडवतात दिशा देतात आनंद देतात. त्यांच्याशी आयुष्यभराची मैत्री केव्हाही चांगली.. नाही का..?
तेव्हा भरपूर मस्त राहा. स्वतःवर पूर्ण विश्वास ठेवा. भरपूर वेगवेगळं काम करा. कष्ट करा. मजा घ्या कामाची. भरपूर मदत ही करा लोकांची. या जगाच्या विविधतेची मजा घ्या आणि आत मध्ये जो आनंद लपलाय त्यात मश्गूल राहायला विसरू नका..
Comeon. Give yourself a chance.
Now.
- दोस्त
